ታሪኽ

ዝዓብዩን ዝበጽሑን ዘለዉ ደቅና ንደግፎም፡ ንምሃሮም፡ ነሰልጥኖም፡ ንጠርንፎም፡ ካብዚ ሓሊፉ’ውን ኣብ ዕዮ ወንጌል ነሳትፎም’ ዝብሉ ሓሳባትን ጾርን፡ ካብ ሓያለ እዋናት ኣትሒዙ ኣብ ልቢ ብዙሓት ወለድን መዕበይትን ከምኡውን ግዱሳት እንዳዓዘዘ ክኸይድ ጸኒሑን ኣሎን። ነዚ ንምትግባር ከኣ ብዝተኻእለ መጠን ገለ ገለ ንኣሽቱ ተበግሶታት፡ ንጥፈታትን ርክባትን ክግበር ድሕሪ ምጽናሕ፡ ኣብ መወዳእታ ብሕብረት፡ ብንጹር መምርሒታትን ዓላማን ነማእክሎ ዝብል ሓባራዊ ስምምዓት ነጊሱ፡ ሓሳብ ንሓሳብ ብምምይያጥ፡ እንታይ እንተተገብረ ይሓይሽ ብዝብል ናይ ሓባር ልዝብን እቲ መስርሕ ሕብረት ብወግዒ ክትግበር ጀመረ። ገና እኳ እቲ ንኸዶ መገዲ ነዊሕ እንተኾነ፡ ብዘሎና ዓቕምታት ሕጂ ንጀምሮ ተባሂሉ ብትስፍው ልብን ኣብ ቅድሜና ብዘሎ ብሩህ መጻእን እምነት ብምግባር ሓደ ኢልና ጀሚርናዮ ንርከብ።

ካልእ እዚ ሕብረት ንምጅማሩ ምኽንያትን ተበግሶን ዝኾነሉ ምኽንያት፡ ንመጻኢ ዝትክኡ ውፉያትን ሓላፍነታውያንን መንእሰያት ጌርካ ንምድላው እቲ ሰዓት ሕጂ ምዃን ኩሉ ስለዝተገንዘበ እዩ። ኣብዚ ብብዙሕ መዳይ ካብ ጽንዓት እምነቶም ዘቢሎም ኣምላኻውን ሞራላውን ብዘይኮነ ሓሳብን መገድን ኣብ ዝድፍኡሉን ዝፍተንሉን ዘለዉ እዋናት፡ ሓቢርና ንሓድሕድና ንምድግጋፍ፡ ብእምነት ንተንስእ፡ ካብ ዝብል ቅዱስ ቅንኢ እዩ ተበጊሱ።